Përfaqësuesit e sindikatave janë shprehur të kënaqur me rekomandimet e dhëna për zgjidhjen dhe definimin e çështjes së punëtorëve në procesin e Privatizimit të sektorit të Distribucionit dhe Furnizimit të KEK.

Prishtinë, 11 tetor 2011 – Sindikatat rajonale të punëtorëve nga Sektori i Distribucionit dhe Furnizimit të KEK kanë vizituar Dhomën për Informim Publik të Njësisë për Privatizimin e KEDS, ku edhe janë informuar për gjendjen aktuale  të procesit të Privatizimit të Distribucionit dhe Furnizimit me Energji Elektrike të KEK.

Gjatë këtij takimi me kryetarët dhe përfaqësuesit e sindikatave të punëtorëve nga ky sektor Menaxherja e Projektit të Privatizimit të KEDS, Fllanza Hoxha, u ka shpjeguar atyre detalisht mbarëvajtjen e procesit deri më sot, nivelin dhe kapacitetin profesional e financiar të kompanive të parakualifikuara dhe me kërkesë të sindikatave, diskutimet informuese janë fokusuar në çështjet sociale të projektit të privatizimit, përkatësisht, çështja e punëtorëve të Distribucionit dhe Furnizimit të KEK.

Përfaqësuesit nga Sindikatat rajonale janë siguruar se Komiteti për Privatizim dhe Qeveria e Kosovës nuk planifikon reduktime të punëtorëve në Sektorin e Distribucionit dhe Furnizimit të KEK.

Fllanza Hoxha i ka thënë përfaqësuesve nga sindikata se “kompania e ardhshme private cila do që do të kualifikohet si blerës i Distribucionit dhe Furnizimit të KEK të gjithë punëtorët e këtij sektori do ti trajtoj sipas kontratave të tyre valide dhe ekzistuese që i kanë nënshkruar më herët me menaxhmentin e KEK të cilat mbrohen me ligjet e vendit në fuqi, përkatësisht me Ligjin e Punës”

Ky është qëndrimi në parim, i cili rekomandohet edhe nga Koorporata Ndërkombëtare Financiare si këshilltare e transaksionit në projektin e privatizimit të KEDS, që është pjesë e Grupit të Bankës Botërore,e që pritet të merr së shpejti edhe aprovimin  nga Komiteti Qeveritar për Privatizim i kryesuar nga Ministri i Zhvillimit Ekonomik Besim Beqaj.

Gjithashtu në takim është theksuar se në simulimin për transformimin e KEDS-it që Korporata Ndërkombëtare Financiare e ka realizuar në bashkëpunim me ekspertët lokal, vlen të theksohet se nuk është marrë parasysh efikasiteti i shtuar që mund të arrihet përmes largimit të punonjësve.
Lidhur me këtë përfaqësuesit e sindikatave janë shprehur të kënaqur me rekomandimet që po epen për zgjidhjen dhe definimin e çështjes së punëtorëve të sektorit të Distribucionit dhe janë shprehur të kënaqur me nivelin e informatave që ju është ofruar atyre për gjendjen aktuale të projektit dhe synimet e privatizimit të KEDS.

Pyetjet kryesore nga përfaqësuesit e sindikatave kanë qenë të drejtuara lidhur me cilësinë e kompanive të parakualifikuara, kontratat e tyre, si dhe pjesëmarrjen  e këtyre sindikatave në procesin konsultativ të privatizimit të KEDS.

Nuk ka pasur vërejtje të veçanta dhe se takimet me përfaqësues të sindikatave pritet të organizohen edhe në të ardhmen për ti informuar ata lidhur me mbarëvajtjen e procesit.

Takimi ka zgjatur rreth një orë e gjysmë dhe në të përpos zyrtarëve të Njësisë për Implementimin e Projektit kanë marrë pjesë përfaqësues nga sindikatat rajonale nga Prishtina, Obiliqi, Besiana, Fushë Kosova, dhe disa rajone të tjera.
Sa i përket afateve kohore sindikalistët janë njoftuar se procesi pritet të përfundoj kah fundi i këtij viti.